من درج الذكريات - بمناسبة رمضان

البلوج ده كنت كتبته على الياهو 360 فى رمضان اللى قبل اللى فات ، يعنى من أول ما قلت يا بلوج .
و بما ان رمضان على الأبواب (كل سنة و انتوا طيبين ) و بما ان البلوج كان عجب الناس ساعتها ، و بما انى مش لاقى وقت أكتب حاجة جديدة ......... قررت احطه هنا كمان. اسيبكم تتفقعوا شوية بقى

نص تيس

المشهد الأول:
المكان: الشغل
الزمان: 2 رمضان
الناس كلهم متجمعين (كريم، بحيري، أسامة، طارق، حسام، و أ/تامر)

- كل سنة و أنتوا طيبين يا جماعة
- رمضان كريم
- هاتصوموا السنة دي وللا زي كل سنة؟
......... -
.................... -
- عاوزين نفطر يوم مع بعض
- والله فكرة
- طب و ناكل ايه؟
- احنا ممكن نجيب بيتزا كينج ...... دول بيدوا واحدة هدية
- لا يا عم احنا نجيب من مؤمن
- مؤمن؟؟؟؟ هي السندوتشات دي تنفع فطار؟ دي يا دوب مسح زور
- بصوا يا جماعة ....... مانشوف المنيو بتاعت حضرموت
دجاج مندي ، لحم حنيذ، ........... نص تيس
- نص تيس؟؟؟!!!! الله ......... طب ما نشترك كلنا و نجيب النص تيس ده
- و الله فكرة حلوة
- حلوة ايه يا عم؟ نص تيس ايه؟
- هو ايه التيس ده أساسا؟؟؟؟؟؟؟؟
- جدي يعني ........... بس متهيألي من غير دقن
- خلاص .......... نبقى نشوف حكاية النص تيس دي
- طب كفاية بقى أحسن أنا جعت

ستــــــــــــــــــــــــــــــــــــــــــــــــار

المشهد الثاني:
المكان: الشغل برضه
الزمان: يعني ........ قول 3 - 4 رمضان
طارق بيكلم سامح عالنت و بيقول لأسامة:

- ســـامح بيسلم عليك
- الله يسلمه
- بيقول عاوزنا نفطر يوم مع بعض
- قشطة
- بس نفطر ايه بقى؟
- ايه رأيك نجيب نص تيس من حضر موت؟
- برضه؟؟؟؟ ده باين عليه دخل دماغك قوي
- قوي (يبكي) ......... أرجوكم حققولي رغبتي
- احنا بس نظبط مع الناس و بعدين نشوف
- طب كفاية بقى أحسن أنا جعت

ستــــــــــــــــــــــــــــــــــــــــــــــــار

المشهد الثالث:
المكان: 6 أكتوبر
الزمان: 6 رمضان بعد صلاة الجمعة
نقاش حول الفطار

- يا جماعة كده ماينفعش .......... شادي و محمد حسن و ابراهيم و أحمد عبد النبي ماجوش
- كده مش هاينفع نجيب نص تيس ........ ده احنا كده خمسة بس
- لأ، أربعة بس ............. أنا مابأكلش الحاجات دي
- عادي ........ هو أنت أصلا بتأكل ايه يعني
- المهم ..... هانعمل ايه دلوقتي؟
- احنا ممكن نسأل على الربع تيس ...... بس عند القرموشي
- مين؟ ايه القرموطي ده؟
- يا عم أي حاجة بس المهم الربع مايطلعش كتير علينا
- أدخل اسألنا كده يا أسامة
- ماشي

- لو سمحت ...... بالنسبة للربع تيس ........
- ماله؟
- نطلبه قبل الفطار بقد ايه علشان يلحق يجهز؟
- عاوزه سليم و للا متقطع؟
- متقطع
- ممكن النهاردة عادي
- حلو ............ طب سعره كام؟
- 100 جنيه
- مممم، طب و الربع ده يكفي كام واحد؟
- تلاتة
- تلاتة ؟؟؟؟؟؟؟؟؟؟؟؟؟؟؟؟؟؟؟؟؟ !!!!!!!!!!!!!!!!!!!!!!!!!!!! ازاي ............ مش معقول
- نعم!!!!!!!! هو ايه ده اللي مش معقول؟
- حرام عليك أنا كنت حاطط عليه أمال كتير
- يا عم هو أنت كنت هاتدخله كاس العالم؟
- يعني ماينفعش أربعة؟ ........... و حياة أبوك
- عاوزين تأكلوه انتوا الأربعة براحتكوا ........ بس بصراحة مش هاتشبعوا
- خلاص ............ كفاية كده .................. أحسن أنا جعت

ستــــــــــــــــــــــــــــــــــــــــــــــــار

المكان: منزل سامح
الزمان: 6 رمضان بعد أذان المغرب
معركة تناول الافطار

- الله أكبر
- حي على الجهااااااااااااااااااااد
- حاسب ..... ده ذراعي!!!!!!!
- و الله الأكل مش بطال
- ايه أخبار الفراخ يا طارق ؟
- كويسة
- بس طبعا مش زي النص تيس
- يا جماعة حرام عليكوا بقى ......... ماتفكرونيش
- معلهش ، إن شاء الله مرة تانية
- و الله كان هايبقى جامد
- خصوصا مع الأرز
- و السلطات
- كنا هانفتك به
- و نهطل بقى ....... يا سلاااااااااااااااام
- طب ممكن كفاية بقى ....................... أحسن أنا جعت!!!!!!!!!!!!!!!!!!!!!

ستــــــــــــــــــــــــــــــــــــــــــــــــار
النـــــــهــايـــــــــــة